Internašunála Sámi Filbmainstituhtta
Ásaheapmi:

Internášunála Sámi Filbmaguovddáš AS ásahuvvui 2007as Guovdageidnui, Norgii. Vuođđodoarjja lei dalle 1,5 milliuvnna ruvnnu filbmadoaimmaide kulturdepartemeanttas ja 300.000:– ruvnnu doaibmaruhtan Sámedikkis. 2014’is ollislaš ruhtadeapmi lei 8. mil NOK.

Internašunala Sámi Filbmaguovddáš lea čakčat 2014’is rievdadan organiserema Internašunála Sámi Filbmainstituhttan. Rievdademiin ISFI lávke ovddosguvlui ja maid lagabui ollašuhttit min mihtuid ja ovddasvástádusaid. Norgga ráđđehus lea dohkkehan ISFI’a našunála ja internašunála stáhtusa ja nu eat sáhte doaibmat regionála guovddážin. Dát lea duogáš nammarievdadeapmái filbmaguovddážis filbmainstituhttii. Mii sávvat ahte rievdadeapmi nanne sámi filbma buvttadeami rivttiid, buot riikain gos sámit ásset.


Višuvdna:

ISFI višuvdna lea addit sámi álbmogii gelbbolašvuođa ja buoret ekonomálaš vejolašvuođaid ovdánahttit, buvttadit ja čájehit iežaset filmmaid sámegillii.

Internášunála Sámi Filbmainstituhtta lea buot ámmát sámi filbmabargiid várás miehtá Sámi sihke Norggas, Ruoŧas, Suomas ja Ruoššas.

Filbmaprošeavttat galget vuostamuččat ráhkaduvvot sámegillii.


Áigumuš:

Internašunála Sámi Filbmainstituhtta galgá:
  • Nannet ja ovddidit sámi filbmabuvttadeami.
  • Doarjut sámi filmma ovdáneami ja buvttadeami, sihke dokumentára, fikšuvdna ja animašuvdna filmmaid sámi doaibmaguovllus.
  • Ovddidit álgoálbmot filmmaid ja ovttasbarggu gaskkal álgoálbmot filbmabargiid máilmmi viidosaččat.
  • Nannet ja ovddidit sámegielat filmmaid/filbmafálaldagaid sámi mánáide ja nuoraide.
Mihtut:

Mihtut viđa jagis 2015–2020:
ISFI galggašii ovdánahttit, doarjut ja co-buvttadit jahkásaččat:
  • unnimusat ovtta TV ráidu/guhkesfilmma
  • 4 sámi dokumentára filmma
  • 4 sámi oanehisfilmma
  • unnimusat 2 sámi mánáid/nuoraidfilmma
  • Árbevirolaš kultuvra/eallin filbmen lea bistevaš doaibma
  • Bearráigeahččat ahte sámi buvttadan fitnodagain leat buoret eallinvejolašvuođat

Buletjávri

Buletjávri lea leamaš headja ja messostállan báiki Guovdageainnus. Doppe leat maid lágiduvvon heargegilvvohállamat. Sátni bulet lea dološ sámi mihttosátni ja mearkkaša sullii 6 neloha (30 kg). Namma mearkkaša ahte jávri gierddai bivdit 6 neloha ja nu lea ge leamaš buorre guollejávri.

Buletjávrris lea láhka Beahcegašvárrái mii lea bivnnut vánddardanguovlu ja dás maid vuolgá ge sihke čuoigan ja skohterláhttu.

Buletjávri lea várddus báikkis oanehis máŧkkáža Guovdageainnu márkanbáikkis, ja nu doaibmá ráfálaš dáiddalaš bargobáikin ja vuogas čoahkkanan báikin. Dáppe lea odne Internašunála Sámi Filbmainstituhtta.