Ávvučájáhus saemien vïrre Tråante 2017



Internašunála Sámi Filbmainstituhtta ovttas Tråante 2017in ja Storytelling mediain bovde ávvučájáhussii Amanda Kernell Saemien Vïrre filbmii. Midjiide lea stuora gudni čajehit Saemien Vïrre, mii lea ávvuduvvon miehtá máilmmi filbma festiválain ja vuoitán máŋggaid bálkašumiid. Ahte juste dát filbma boahtá ruoktot Lulli-Sápmái lea erenoamáš illudahtti.

Deaddil liŋkka dás gos sáhtát oastit billeahta čájáhussii. Filbma čajehuvo oktii Tråante 2017, Nova Kinos guovvamánu 5.b 2017, dii 18:00.

Filbma konsuleanta



Internašunála Sámi Filbmainstituhtta almmuha filbma konsuleanta virggi, álgin 1.2.2017.
Jahkemearre virgi njeallji jahkái, sáhttá vejolaš guhkidit ovtta geardde.

Filbmakonsuleantta váldo barggut:
  1. Aktiivvalaččat nannet kreatiivvalaš vejolašvuođaid mat gávdnojit erenoamážit sámi filbma ja maid TV ealáhusas. 
  2. Árvvoštallat ja gieđahallat sihke ovdanahttin ja buvttadan ohccamiid ja ovttas direktevrrain stivrra ovddidit daid.
  3. Sihkkarastit buoremus ovdanahttima prošeavttain mat leat ožžot ISFIas doarjaga, gulahallama bokte sihke buvttadeddjin, bagadallin ja čállin.
  4. Hukset ja doalahit oktavuođa sámi ja álgoálbmot filbmabuvttadan birrasin.
  5. Čuovvut mielde našunála ja internašunála filbma ealáhusa ovdaneamis. 
  6. Leahket mielde ISFI huksemis. 
Gelbbolašvuođa gáibádusat: 
  • Hálddaša sámegiela njálmmálaččat ja čálalaččat
  • Hálddaša eŋgelasgiela njálmmálaččat ja čálalaččat
  • Filbmafágalaš oahppu dahje nanu bargohárjáneapmi
  • Bargohárjáneapmi internašunála dásis
  • Hálddahuslaš bargohárjaneapmi
Peršuvnnalaš attáldagat: 
  • Iešheanálaš ja barggán
  • Sosiála ja gulahalat erenoamáš bures juohkelágan olbmuiguin
  • Máhtát almmolaš oktavuođain ovdanbuktit nugo festiválain, seminarain, panelain jna
  • Čorgat ja effektiiva
Johtin lea oassin barggus, nu ahte dasa ferte ráhkkanan. Máŧkegolut gokčojuvvojit stáda satsaid mielde. Bálká šiehtaduvvo. Bargosadji: Guovdageaidnu. Ohccit sáhttet gohččojuvvot jearahallamii.

Internašunála Sámi Filbmainstiuhtta lea gelddolaš ovdaneamis sámi filbma ealáhusa huksemis. Mis leat ollu filbma prošeavttat jođus ja mis lea stuora internašunála álgoálbmot filbmafierpmádat geaiguin ovttasbargat máŋgga dáfus. Ulbmilat ISFI loga eambbo: ISF_Articles.pdf

Ohcan áigemearri: 1.12.2016.
Ohcan oktan mildosiiguin sáddejuvvo elektruvnnalaččat: annelajla@isfi.no
Eambbo dieđut: ISFI direktevra Anne Lajla Utsi, tlf +47 907 555 74

Sameblod

Amanda Kernell guhkesfilmmas Sameblod lei vuosttaš čájálmas Venezia filma festiválas čakčamánus 2016is. Amanda Kernell vuittii guokte bálkašumi filmmain Venice days prográmma oktavuođas. Fedeora filbma kritihkka bálkašumi buoremus ođđa bagadalli ja Europe Cinema Label bálkášumi, mii veahkeha filmma biđgema Eurohpas.

Sameblod lea maid čajehuvvon Toronto International filbma festiválas ja Sao Paolos, Brasilias ja skábmamánus čajehuvvo Tokyo filma festiválas gilvoprográmmas. Filmmas lea davviriikalaš premiere ođđajagis 2017is.

Internašunála Sámi Filbmainstituhtta áigu initieret sámi filbma turnea Sameblods filmmas ođđajagis 2017is vai miehtá sámi besset oaidnit dán filmma.

Lihkkusávaldagat Amanda Kernellii go lávke internašunála filbma lávdái dáinna erenoamáš buriin filmmain ja buktá ruoktot sihke buriid árvosániid filmma birra ja maiddái bálkašumiid. Dát filbma gieđahallá vuohkkasit losses kapihttala Sámi historjjás. Giitu Amanda!

Geahča ovdalaš ođđasiid...